Ֆիզգորոդոկը և մենք- տոնական ճամփորդություն

Սեպտեմբերի մեկը Ֆիզգորոդոկում իրական տոն էր դարձել։ Մխիթար Սեբաստացի կրթահամալիրը հերթական այցով միացավ տոնական միջոցառումներին։ Կազմակերպությունները տարբեր տաղավարներում բնագիտական փորձեր էին իրականացնում, պատմում գիտության կարևորության մասին։ Փորձերից շատերին մասնակցում էին նաև այցելուները՝ հատկապես երեխաները։ Երգ-երաժշտություն, պար, հյուրասիրություն, գեղեցիկ ցուցադրություն, տպավորիչ գիտելիքի տոն էր։

Մեր այցելության նպատակը, սակայն, միայն գիտափորձերին մասնակցելը չէր, այլ նաև բնակիչների հետ շփումը, ծանոթացումը Երևանի ամենակոլորիտային թաղամասերից մեկին՝ իր ամբողջության մեջ, այդ թվում բնակիչների հետ, նրանց կենսակերպին, առօրյային։ Բնակիչները մեզ հարազատ ընդունեցին, պատմեցին միջոցառման կարևորության մասին և հատկապես նշեցին Գիտավանի ամենամեծ խնդիրը, որը իրենց պայքարելու ու համախմբվելու առիթն է դարձել։

Վերջերս հայտնի դարձավ, որ Ֆիզիկայի գիտավանում բարձրահարկ շենքի կառուցման թույլտվություն ունի կառուցապատողներից մեկը։ Բնակիչների խոսքով՝ շինթույտվությունը տրվել է առանց հանրային քննարկման և մի շարք խախտումներով, կանաչ գոտու հաշվին։ Շենքի կառուցմանը իրենք դեմ են և պատրաստ են պայքարել իրենց իրավունքների համար մինչև արդյունքի հասնելը, այդ թվում՝ դիմել են դատարան։ Չնայած բնակիչների ընդվզումներին և գործի դատական ընթացքին, կառուցապատող <<Ռատկո ընկերությունը>> արդեն սկսել է շինարարական աշխատանքները և իրականացրել է ծառահատումներ, ինչի մասին ահազանգել են բնակիչները, սակայն քաղաքապետարանից համապատասխան արձագանք չեն ստացել։ Վերջերս խնդրի շուրջ քննարկումներին մասնակցել է նաև ԱԺ պատգամավոր Անուշ Բեղլոյանը։ Արձանագրվել են իրավիճակի մասին մանրամասներ, և բնակիչներն հույս ունեն շուտով ստանալ իրենց իրավունքները պաշտպանող արձագանք գոնե այս միջոցով, քանի որ ոստիկանությունից և քաղաքապետարանից հույս չունեն, իսկ դատարանը ձգձգում է։

Իսկ սեպտեմբերմեկյան <<տոնակատարությանը>> մասնակցելու էին եկել հայտնիներ, որոնք աջակցում են բնակիչների պայքարին՝ ապօրինի շինարարությունների դեմ կամ պարզապես վայելելու լավ համերգ, կարևոր միջոցառում։ Մեր ուշադրությունը գրավեց նաև Գիտավանի հիշողությունները ցուցադրող լուսանկարների ներկայացումը, բնակիչների սերը, կազմակերպվածությունն ու միասնականությունը։ Երևանցիների սիրելի Ֆիզգորոդոկը ներկայացել էր իր ողջ ներուժով ու հմայքով։

Վաղաշենի բնապահպանական ճամբար․ ամփոփում

Սևան ազգային պարկում Վաղաշենի բնապահպանական ճամբարի մեր խումբը հերթական փուլն իրականացրեց օգոստոսի 8-10-ը։ Ուղևորությունն սկսեցինք Սուրբ Երրորդություն եկեղեցու բակից։ Վաղաշենում մեզ դիմավորեցին հարավային դպրոցի ճամբարականները(ղեկավար՝ Գոհար Սմբատյան)։ Իրականացրինք հերթափոխի ծիսական փոխանցումը Սյուզի Մարգարյանի և Աննա Երիցյանի հետ միասին՝ երգ ու պարով, խաղերով։ Ճամբարականները դասավորեցին իրերը, ճաշեցինք, Սևան ազգային պարկի Մարտունու մասնաճյուղի պատասխանատու Արթուրի ուղեկցությամբ ծանոթացանք տարածքին, ճաշից հետո մաքրեցինք լողափնյա մի հատվածը, ալեկոծ Սևանի գեղեցկության ու հրապույրի ներքո, իրենց իսկ մաքրած հատվածը վայելեցին սովորողները՝ անցկացնելով լողի և մարզական պարապմունք։ Երեկոյան ընթրիքին մեզ օգնեցին արևային լապտերները:

Ճամփորդական երկրորդ օրը Առավոտյան շատ վաղ սկսվեց, ճամբարականները օրը վայելելուն և աշխատելուն շատ էին տրամադրված: Մարմնամարզություն, տարածքի և վրանների մաքրում, դասավորում, թեյ, նախաճաշ, լողի պարապմունք, շունիկների խնամք… մեզ տրամադրվեցին նոր, համապատասխան պարկեր: Ծանոթացանք Սևան ազգային պարկի Մարտունու մասնաճյուղի տնօրեն Թաթուլ Բաղդասարյանի և ազգային պարկի փոխտնօրեն Աղաբեկ Ղազարյանի հետ, քննարկեցինք առկա և իրականացվող աշխատանքները, էկոլոգիական վիճակը: Տարածքի մանրակրկիտ մաքրում, էկոլոգիական վիճակի մասին զրույցներ, քննարկումներ, ուսումնասիրություն և անկեղծ, փաստարկված սեր Սևանի, բնության հանդեպ…

Ճաշից հետո, ֆիզիկական աշխատանքն ավարտելով, ուղեղի հավես մարզում իրականացրինք՝ մաթեմատիկական ֆլեշմոբային խնդիրների թարմ քննարկումով, խաղ-մրցույթով, որտեղ թիմերը ներկայացրին նաև իրենց առաջարկած խնդիրները: Մեզ միացած ընկերները զարմացան, որ ունենք ամենամսյա <<Կենգուրու>>։

Հաջորդիվ՝ լողի պարապմունքներ, վոլեյբոլ, տարածքի մաքրում, փայտի հավաքում: Երեկոյան ընթրիքը անտառում իհարկե պատկերացնելի չէ առանց խարույկի, թեյի, մրգի, քաղցրի և գաղափարների փոխամակման: Կամավորները ներկայացրին հասարակական տարբեր թեմաներ և տարածվեց քննարկում, և իհարկե, էկոլոգիական գիտելիքների և փորձի փոխանակում, Վաղաշենում իրականացված աշխատանքների քննարկում, ամփոփում և իհարկե կարտոֆիլի փուռ:

Ճամբարի վերջին օրը, առավոտյան վաղ, ճամբարականներին արթնացրին շնիկները, ինչին իհարկե իրենք դեմ չէին: Արևածագով սկսվեց օրը: Թեյախմություն, վրանների մաքրում, տարածքի խնամք և մաքրում, փայտի հավաքում, մարմնամարզություն, նախաճաշ, լողի պարապմունքներ և նախապատրաստական աշխատանքներ իրականացրինք հաջորդ հերթափոխի համար, որը ծիսական երգ ու խաղով փոխանցեցինք Հարավային դպրոցին՝ Շամիրամ Պողոսյանի գլխավորությամբ:

Ճամփա ընկանք, բայց այսքանով չավարտվեց ճամփորդությունը: Հայրավանքում բացահայտեցինք գեղեցիկ, գողտրիկ 15-րդ դարի եկեղեցին՝ դարերի օրհնությամբ ու ջերմությամբ: Աղոթքով ողջունեցինք հոգևոր տանն ու հաճելի տպավորություններով վերադարձանք:

Սևանը սիրեց մեզ այնքան շատ, որքան մենք իրեն՝ խնամքով: